Suliffissaaleqisunik sulilersitsiniarneq pillugu Inatsisartut peqqussutaat nr. 14, 12. november 2001-imeersoq.
Suliassaqartitsiniarnermik inunnillu isumaginninnermik Kalaallit Nunaannut inatsit nr. 580, 29. november 1978-imeersumi § 2 naapertorlugu makku aalajangersarneqarput:
Siunertaa atorneqarfissaalu
§ 1. Inatsisartut peqqussutaata siunertaraa kommunimi suliffissaaleqisoqaleriataartarnera oqilisaaviginiarlugu kommunit sulilersitsiniarnermut suliniuteqarnissaannik periarfissinnissaat, aamma kommunimi suliffissaaleqisut sulisinneqarnissaannut periarfissat pitsanngorsarnissaat.
Imm. 2. Sulilersitsiniarnermut suliniutit makkuusinnaapput:
1) suliffissaaleqisup ilinniagaqarnissaanik tassunga ilanngullugu ilinniaqqinnissaanik, tak. § 2 imaluunniit
2) suliffissaaleqisup kommunip sulilersitsiniutaani sulisinneqarnissaanik neqerooruteqarneq, tak. § 4.
Ilinniagaqarnissamik neqeroorutit
§ 2. Ilinniagaqarnissamik neqerooruteqarnikkut suliffissaaleqisup sulilersinniarneqarnissaanik kommunalbestyrelsi aalajangiisinnaavoq, tassunga ilaalluni ilinniaqqinnissamik neqerooruteqarneq.
Imm. 2. Inatsisartut peqqussutaanni matumani malittarisassat malillugit ilinniartitaanerni pikkorissarnernilu sorlerni peqataasoqarsinnaanersoq, aammalu suliffissaaleqisup ilinniakkamut pikkorissarnermulluunniit peqataanissaanut piumasaqaatit pillugit Naalakkersuisut aalajangersaassapput.§ 3. Suliffissaaleqisoq ilinniarnermini pikkorissarnerminiluunnit ilinniakkamut pineqartumut tapiissutaasartut aalajangersagaareersut annertoqataannik ilinniagaqarnermi ikiorsiissutisisinnaatitaassaaq, taamatuttaaq ilinniagaqarnermi ikiorsiissutit tunniunneqartassapput tamatumunnga pineqartumut maleruagassat pioreersut naapertorlugit.
Imm. 2. Ilinniartitaaneq pikkorissarnerluunniit inatsisit allat naapertorlugit tapiiffigineqarsinnaatitaanngippat, suliffissaaleqisoq ilinniagaqarnermi ikiorsiissutisisinnaatitaassaaq, ilinniartitaanermi assingusumi pikkorissarnermiluunniit assingusumi malittarisassat atuuttut naapertorlugit tapiissutisisinnaatitaanermut assingusumik annertussusilinnik.
Kommunit sulilersitsiniutaannik pilersitsinermi ingerlatsinermilu piumasaqaatit
§ 4. Peqqussummi matumani malittarisassat tunngavigalugit kommunalbestyrelsi aalajangiisinnaavoq kommunip sulilersitsiniutai aqqutigalugit suliffissaaleqisut sulilersinneqassasut.
Imm. 2. Kommunit sulilersitsiniutai paasineqassapput tassaasut suliniutit kommunimit ataatsimit kommuninilluunniit arlalinnit ataatsimoorullugit pilersinneqarlutillu ingerlanneqartut aningaasalersorneqartullu.§ 5. Kommunalbestyrelsi pisussaavoq sulilersitsiniutini piumasaqaatit nalinginnaasut makku naammassineqarsimanissaat qulakkiissallugu:
1) Sulilersitsiniutip aallartinneqannginnerani pilersaarummut nalunaarsuut saqqummiunneqarsimassaaq minnerpaamik makkuninnga imaqartussaq:
a) sulilersitsiniutip siunertaa
b) sulilersitsiniummi suliassat
c) sulilersitsiniutip siulersorneqarnera
d) siunniussat kikkuuneri
e) peqataasussat qassiussusissaat
f) sulilersitsiniutip atuunnissaata sivisussusissaa aamma
g) sulilersitsiniummut aningaasatigut missingersuusiat
2) Sulilersitsiniummut qullersaasunik aqutsisoqassaaq aammalu sulilersitsiniut ulluinnarni aqutsisoqassalluni.
3) Sulilersitsiniummik aqutsisut nalilersuiuarnissaat qulakkeerneqarsimassaaq, taamatuttaarlu sulilersitsiniummik nakkutilliisuussallutik.§ 6. Sulilersitsiniutit aallartinneqarnissaat sioqqullugit sulinermik inuussutissarsiuteqartut kattuffii aamma sulisitsisut kattuffii pissutsinut §§ 7-8-mi aamma §§ 11-13-imi taaneqartunut oqaaseqaateqarnissaannik kommunalbestyrelsip periarfississavai.
§ 7. Sulilersitsiniutinik pilersitsinerup ingerlatsinerullu suliffeqarfinni pioreersuni nioqqutis-sat sullissinerillu pioreersut ingerlanneqareersulluunniit piumaneqarneri annikinnerulersissanngilai.
Imm. 2. Sulilersitsiniutinik pilersitsinerup ingerlatsinerullu atorfiit sulilersitsiniummi suliassanut attuumassuteqartut ikinnerulersissanngilai.
Imm. 3. Sulilersitsiniutinik pilersitsinerup ingerlatsinerullu inuussutissarsiutitigut ilinniartitaanerni ilinniartut sulinermik sungiusarfigisinnaasaat ikinnerulersissanngilai.§ 8. Sulilersitsiniutit taamaallaat tunisassiorsinnaallutillu nioqqutissanik tuniniaasinnaapput niuernermi atugassarititaasut atuuttut malillugit, matumani sulianut taamaattunut tunngasut tuniniarneqartarnerini akigitinneqartuni nalinginnaasumik iluanaarutissatut naatsorsuutigineqartartoq ilanngutereerlugu.
Akissarsiat atorfinitsitaanermilu atugassarititaasut
§ 9. Sulilersitsiniummi sulilersitsoqassaaq aatsaat suliffissaaleqisup peqqissutsimigut inuttulluunniit atukkamigut allatigut atugaasa tamanna akornutissaqartinngippassuk.
§ 10. Sulilersitsiniutini inatsisartut peqqussutaat manna naapertorlugu sulisut sulisinneqarnerup ingerlanerani suliffissarsiortutut nalunaarsimassapput. Tamannali atuutinngilaq sulilersitsiniummi ilinniagaqarneq ingerlanneqarpat.
§ 11. Sulisoq akissarsiaqartinneqassaaq ilinniagaqarsimanngitsutut nalunaaquttap akunnermusiat minnerpaaffiat qaqugukkulluunnit atuuttoq naapertorlugu, tak. SIK-p Naalakkersuisullu sulisunut ilinniagaqarsimasunut ilinniagaqarsimanngitsunullu nalunaaquttap akunnermusialinnut isumaqatigiissutaat.
Imm. 2. Akissarsiat ullut 14-ikkaarlugit kingumoortumik tunniunneqartassapput, sulisullu nalunaaquttap akunneri suliffigisimasai tunngavigalugit naatsorsorneqartassallutik.
Imm. 3. Sulilersitsiniut ilinniagaqarnermik ilaqarpat tassunga atatillugu sulisoq akissarsiaqartinneqassaaq § 3-mi malittarisassat naapertorlugit.§ 12. Sapaatip akunneranut suliffissaq agguaqatigiissillugu annerpaamik nalunaaquttap akunnerinik 40-nik sivikinnerpaamilli nalunaaquttap akunnerinik 20-nik sivisussuseqassaaq.
§ 13. Atorfinitsitaanermi atugassarititaasut sulianut assigusunut isumaqatigiissutini atugassarititaasut aalajangersarneqarsimasut assigissavaat, pineqartunulli isumaqatigiissuteqanngippat atorfinitsitaanermi atugassarititaasut sulianut assigusunut nalinginnaasumik atugassarititaasartut assigissavaat.
Aqutsineq
§ 14. Inatsisartut peqqussutaata matuma aqunneqarneranut kommunalbestyrelsi akisussaavoq.
Imm. 2. Kommunit aqutsinerminnut atatillugu suliffissaarusimasut inatsisartut peqqussutaat tunngavigalugu sulilersinneqartut tamaasa kisitsisitigut takussutissiortassavaat.
Imm. 3. Naalakkersuisut nalunaarusianut piffissalersuisinnaatitaapput kiisalu ilusissaa imarisartagassaalu pillugit erseqqinnerusumik malittarisassanik aalajangersaasinnaallutik.§ 15. Kommunalbestyrelsi pisussaavoq suliffissaaleqisut peqqussummi matumani malittarisassat tunngavigalugit sulilersinneqartut sulilersinneqalinnginnerminnut naleqqiullugu aningaasatigut atukkaminnit ajornerusumik atugaqalinnginnissaat qulakkiissallugu.
Aningaasalersorneqarnera
§ 16. Inatsisartut peqqussutaat manna malillugu aningaasartuutit kommuninit aningaasartuutigineqassapput, taamaattorli tak.§ 3, imm. 1.
Atortussanngortitsineq
§ 17. Inatsisartut peqqussutaat manna 1. januar 2002 aallarnerfigalugu atortuulersinneqarpoq.
Imm. 2. Tamatumunnga peqatigitillugu suliffissaaleqisunik sulisitsiniarneq pillugu Inatsisartut peqqussutaat nr. 9, 3. november 1994-imeersoq atorunnaarsinneqarpoq.
Imm. 3. Inuit inatsisartut peqqussutaat imm. 2-mi taaneqartoq malillugu 31. december 2001-imi sulilersinneqarsimasut sulilersinneqarnertik naammassisinnaavaat aalajangersakkat siusinnerusukkut atuuttut naapertorlugit.
Namminersornerullutik Oqartussat, ulloq 12. november 2001.
Jonathan Motzfeldt/
Ole Dorph